(مصر هى امى ) بس معرفتش تربينا

مصر هى امى اكيد طبعا

يعنى مين اللى بيعلمنى ومين اللى بيعالجنى ومين اللى مبيرضاش يشغالنى اكيد طبعا هى مصر امى وامنا كلنا

وعلى فكرة مصر دى ام طيبه اوى اوى اوى و بتحب كل ولدها

يعنى مثلا هى متعالجناش كويس ليه اكيد طبعا علشان نستريح على طول وندخل الجنه

يعنى فى حب اكتر من كده

اما بالنسبه للشغل فمصر اللى هى امى وامك ما بتحبش تتعب اولادها فى الشغل والكلام الفاضى ده

فبتخليهم قاعدين جنبها على القهوة يعنى منهم يرتاحوا ومنهم يفدوها لو عايزة تشترى حاجة

شفتوا حب اكتر من كده !!!!!!!!

بس ياخسارة

من كتر الدلع اللى اتدلعناه طلعنا مش متربيين

يعنى بقينا متضايقيين من عيشتنا وقرفنين من اى حاجة وده طبعا من الدلع الزياده

يعنى بيقت تلاقى الناس بتحتج وتعمل اضرابات واعتصامات وبقيت تلاقى كل الجرايد والمجلات مش طايقيين الوضع

فى مصر ............

اهو كل ده من الدلع الزياده

وبقينا نسمع كلمه جديده اسمها لالالالالالالا

ونسنا الكلام الحلو بتاع زمان زى تمام يا فندم واحلامك اوامر وكمان تحيا مصر وافريقيا

والله كان كلام حلو كان وبيريح

بس يا خساره مصر معرفتش تربى وبقى كل الناس بتخبط فيها

وطلع واحد زيى علشان يتتريأ هههههههه

شهر الديناصورات

كل سنه وانتم طيبين رمضان كريم ........

اهلا رمضان اهلا رمضان

احسن حاجة فى رمضان فى مصر ان ساعه الفطار بتحس ان الناس قاعدين على السفرة

بتحفز وكل واحد قاعد يسخن اللى تلقيه عمال يلعب فى المعالق والتانى اللى بيملا كبايه الميه

واللى بيبقى قاعد بيعد بس عمال يبص للاكل ويقله خلاص فضل دقيقتين انا جاىىىىىى

وفى وسط الجو ده فجاه وبدون سابق انذار المدفع يضرب بوووووووووووم

والاذان ياذن وتلاقى كل الناس اللى قاعده على السفره اتحولوا من حاله السكون اللى كانوا عليها لحاله غريبه اكيد كلكم عارفينها وتلاقى كل واحد فيهم يتمنى انه فى الوقت ده يكون عنده حوالى

6 ايد و3 فم علشان يلحق يكوش على اكبر كميه من الاكل

بس بجد بيبقى ماتش مثير لدرجة ان مفيش حد بيبقى فاضى يشوف التانى بيعمل ايه

المهم بعد 5 دقائق من بدايه الماتش يبدا الناس تفوق بقى ويبتدوا يعزموا على بعض ويحلفوا

والله لازم تاخد الحته دى منى والتانى يقوله بس انت خالى بالك من نفسك وكل الاول وتبدا المجاملات .......................

ووبعد الفطار الجامد ده تلاقى كل واحد بقى منفوخ على الاخر ومفيش حتى مكان للنفس

وتحس انك قاعد فى وسط مجموعه من الدايناصورات

ده طبعا بيكذب اللى بيقولوا ان الدايناصورات انقرضوا

وكده الناس غيروا اسم شهر رمضان من شهر الطاعة والعبادات الى شهر الديناصورات

فيا سلام لو الزمان يررجع زى زمان ويرجع تانى شهر العبادات ونقضى بقى على الديناصورات

هههههههههههههههههههههه