من صغرى وانا واقف اتفرج
على ناس فى الشارع اشكال والوان
ده بيضحك وده ماشى يهرج
وده شكله غريب راجل تعبان
ودى ماشيه بتحكى عن جوزها
والتانيه بتلولنا فى بوزها زى مايكون عاوزين احسان
وده ماشى مع صاحبه تملى
والتانى يقول ماخلاص خلى المره هديه منى كمان
والحلوة ماشيه بتتمخطر
خطويها على قلبنا اخطرمن خضه ورعب وسكتان
والحاجه بتنقى فاصوليا
طبعا ماتكنش من الغاليه وتقول وسعى عاوزة بتنجان
وشباب حلوين صحيين بدرى
كله على شغله راح يجرى عاوز يتثبت فى مكان
وبتاع الفول على عربيه
معلش قديمه مصديه نفسه يفتح له فى يوم دكان
وانا لسه فى مكانى بتفرج
لا انا بضحك ولا عارف اهرج مش لاقى فى الصورة مكان
