بلاش الاوتوبيس

هحكى لكم عن تجربتى فى الاوتوبيس بس يعنى فى صورةشعر

الجديد فى الموضوع ده ان معظم الكلام ده اتكتب وانا فى الاتوبيس

وعايز اسمع رايكم

اتوبيسنا ده حكايته حكايه

وبطل ميت قصه وروايه

ديما تلاقيه ماشى على جنبه

وعملنا فيها ابو جلانبو

تركبه لو عاوز تتأخر

أو ناوى تألف وتفكر

أو عاوزين تتفشوا منن بتكم

ترجعوا نادمين على عملتكم

او واقف راح واحد زأك

تقعد تدعى عليه لو قابلك

لو تركبه تلاقيه مقفول

مسدود بالعرض وبالطول

وتلاقى دراعات وايادى

ورجول طالعين من الناحيه دى

والزحمه تخنق انفاسك

وصداع شغال ضرب فى راسك

والكمسرى طبعا مين قده

الباقى عمره ما يرده

والناس عماله تتكلم

ولا واحد يشكى ولا يبلم

والاغرب فى ناس بتهزر

اوعاك تستغرب مالمنظر

لو تفضل تصرح وتنادى

او تدعى الرحمن الهادى

انك تنزل الناحيه دى

ابقى قابلنى فى المرة دى

اما ان فجأة كده نطيت

وخبطت دماغك فى الحيط

وهربت منه وعديت

تبقى انت منه اللى نجيت

وكانك طوفت وحجيت

وبسرعه اجرى على البيت

واياك تركبه تانى مره

كابوس

الصبح غرق الظلام يا فرحتى

يومى الجديد بدا ولسه فى فرشتى

بس هفوق لازم اقوم من غفوتى

انا نومى طال بقى حالى حال فين عفيتى

ده انا اسمع انى كنت يوم اشيل حجر قاسى

وايه تبقى قساوته فى قوتى

دلوقتى بقى فين الحجر بقى شيىء اثر

فين النهارده فى دنيتى

اليوم بقى الكل يقول ده كان كذا

دلوقتى مامنوش اذى يا وكستى

هو ايه كان السبب ايه اللى حصل

هو الفساد ولا العناد ولا الغباوة والكسل

ولا الدناوة والرشاوى ولا تزويغى من العمل

ولا اكيد بحلم وتبقى دى حجتى

وانا لسه عايش فى زمانى وقوتى

والدنيا دى تبقى اكيد مش دنيتى

ناموسه بتزن

وانا قاعد بتفرج على التليفزيون وكالعاده بتابع الاضرابات اليوميه بتاعت المصريين المنتشره على جميع القنوات
وانا طبعا صعبان عليا حال الناس وخايف انى اقلاقى نفسى معتصم فى مرة او مضرب عن الطعام
المهم حسيت بحاجه غربيه
سمعت صوت زن جنب ودانى واكتشفت ان فى ناموسه رخمه عماله تزن ومش سيبانى
فقررت ان العب مع الناموسه لعبه الشعب والحكومه
وكبرت دماغى ولا عربتها
وهى لسه بتزن وكانها بتطالب بمطالبها وانا برضه مكبر دماغى طبعا علشان مش فهمها
وهى شغاله زن نننننننننننن
بدات ازهق واتضايق زى ما الحكومه بتعمل بالظبط
قررت استخدم العنف
بدات احاول اهش الناموسه دى باى طريقه بس الظاهر انها فعلا صدقت انها الشعب ومش عايزه تمشى خالص
وانا كمان اندمجت وحسيت انا الجينات الحكوميه اتملكتنى وكان نفسى اعتقل الناموسه دى
وهى لسه على موقفها
قلت خلاص انا استمر فى تطبيق سياسه الحكومه ولما نشوف
اصل انا اسمع ان قرارات الحكومه بتاعتنا حكيمه وذكيه ما علينا
اعتبرت ان مفيش اصلا ناموسه وعاملتها كانها مش موجوده
بس حصل اللى ما كنتش اتوقعه
على غفله منى.................... الناموسه قرصتنى
بس انا مزعلتش ليييييييييييييييه؟
لانها فعلا عندها حق دى قعدت تهدد فيا وتطالب وتشجب وتدين وانا مكبر دماغى
كان لازم تعبر عن نفسها وتقولى انا ناموسه وليا كيانى وحقوقى لازم تتنفذ
بس يا خسارة فهمت كده بعد ما اتقرصت وخلاص
واكشفت ان سياسه حكومتنا طلعت فاشله حتى مع الناموسه